Kuri uyu wa kane Perezida Paul Kagame na Bill Clinton wahoze ayobora Leta zunze Ubumwe za Amerika uri mu ruzinduko mu Rwanda kuva kuri uyu wa gatatu, baragirira uruzinduko mu Turere twa Kayonza na Rwamagana mu Ntara y'Iburasirazuba basura ibikorwa bitandukanye by'iterambere muri utwo turere.
Abatuye uyu mudugudu wa Nyagatovu barasurwa na Kagame na Clonton
Mu karere ka Kayonza, barasura uruganda rwa Mount Meru Soyco Ltd rurimo kubakwa mu murenge wa Mukarange, uru ruganda rukazajya rutunganya Soya n'ibihwagari rukayibyaza amavuta.
Uru ruganda ruhuriwe n'abikorera ndetse na Leta bose bagiye bafitemo imigabane itandukanye biteganyijwe ko ruzuzura mu kwezi kwa gatatu umwaka utaha rutwaye amafaranga angana ma miliyoni 10 z'amadorali (10m US$), rufite ubushobozi bwo kuzazajya rutunganya umusaruro ungana na toni 200 z'amavuta ya Soya buri munsi.
Uretse uru ruganda Clinton na Prezida Kagame bazasura umudugudu w'icyitegererezo wa Nyagatovu uri mu murenge wa Mukarange muri Kayonza. Uyu mudugudu utuwe n'abaturage 208, ugizwe n'amazu 84 wubatse ku buryo bugezweho
Abawutuye bafite ibikorwa remezo nk'amashanyarazi, amazi, uturima tw'igikoni, Biogaz, abahatuye amatungo yabo bayororera mu biraro rusange.
Abo bashyitsi bakazasoreza uruzinduko rwabo mu ishuri rikuru ry'ubuforomo n'ububyaza rya Rwamagana.
Bill Clinton kuri uyu wa gatatu ku gicamunsi nibwo yageze mu Rwanda ahita yerekeza ku bitaro bya Butaro mu majyaruguru y'u Rwanda, aho we n'uwatangije umushinga wa Parteners in Health ndetse n'umukinnyi wo gutwara amamodoka mu marushanwa ya NASCAR muri Amerika witwa Jeff Gordon batangije ikigo cyo kurwanya indwara ya Cancer.
Abatuye umudugudu wa Nyagatovu bororera mu kiraro rusange
Ubwanditsi
UMUSEKE.COM
0 comments:
Post a Comment