Kuri uyu wa gatatu mu gitondo, nibwo byari biteganyijwe ko umutoza Jean Marie Ntagwabira abonana n'ubuyobozi bw'ishyirahamwe ry'umupira w'amaguru mu Rwanda. Nyuma y'iyi nama yabahuje nibwo byatangajwe ko Jean Marie Ntagwabira yahagaritswe by'agateganyo nk'umutoza wungirije mu ikipe y'igihugu Amavubi.
FERWAFA yamuhagaritse by’agateganyo ngo ikore iperereza kubyo yatangaje//photo archives umuseke.com
FERWAFA mu itangazo yasohoye ivuga ko "Nyuma yo kumva ibyavugiwe muri Conference de Presse yakoreshejwe n’umutoza Jean Marie NTAGWABIRA kuwa gatanu tariki ya 06/07/2012, Komite Nyobozi ya FERWAFA mu nama yayo yo kuwa 18/07/2012 imaze kumva ibisobanuro by'uwo mutoza, yafashe icyemezo cyo guhagarika by’agateganyo uwo mutoza Ntagwabira mu ikipe y’igihugu Amavubi no mu yandi makipe y’umupira w’amaguru mu Rwanda mu gihe hagikorwa iperereza ku bandi bavugwa muri icyo kibazo".
Ibyo Jean Marie Ntagwabira yatangaje, avuga ko habayeho kugura abakinnyi ba Rayon Sports ubwo we yari umutoza wa Kiyovu ngo batsinde Rayon, ariko akavuga ko yabifashijwemo n'uwitwa Issa, we waje kubihakana avuga ko icyo gihe mu kwezi kwa gatatu 2010 yari i Kinshasa.
Jean Marie Ntagwabira wari uvuye mu biruhuko muri Tanzania, wari ufite kandi urugendo rwerekeza i Burundi kuri uyu wa gatatu, yavuze ko adashimishijwe n'uyu mwanzuro wamufatiwe kuko utashingiye ku mategeko ahari agaragara.
Jean Marie Ntagwabira watoje APR, Atraco, Kiyovu, Rayon Sports ndetse n’Amavubi mu 2004 (yungirije) yari aherutse kwegura mu ikipe ya Rayon Sports kubera ibyo yise imicungire mibi n’akavuyo muri iyi kipe.
UMUSEKE.COM
0 comments:
Post a Comment