Mu kiganiro na BBC Afrique kuri uyu wa kabiri tariki 29 Gicurasi, Lambert Mende, Ministre w'itumanaho akaba n'Umuvugizi wa Leta ya Congo Kinshasa, yavuze ko bari kwikorera iperereza, kandi ko Congo yitondeye cyane ibi bivugwa.
Lambert Mende avuga ko abo barwanyi bashaka guteranya ibihugu byombi/photo Reuters
Lambert Mende Omalanga ati: " Turi kubikoraho iperereza, ariko ukibyumva hari icyo wakeka kuko nta nyungu yaba ihari kubantu bafashwa n'igihugu kugitangaza mu gihe nta gushwana hagati yabo kwabayeho.
"Aho tubona bigana ni ugushotorana, bivuze ko bariya bagabo bato b'abanyabyaha bashobora kuba batarabonye ubufasha bw'icyo gihugu kivugwa, baaba bashaka gushwanisha RDC n'u Rwanda batangaza hose ko bafashwa. Ntabwo ari MONUSCO yonyine babibwiye, mu bitangazamakuru, mu biganiro n'ingabo za FARDC… muri macye turi kubikoraho iperereza kandi turabyitondeye cyane" Lambert Mende
Louise Mushikiwabo, Ministre w'Ububanyi n'amahanga w'u Rwanda nawe yaboneyeho kongera gushimangira ko ibivugwa ku Rwanda ari ibinyoma.
Yagize ati: "Leta y'u Rwanda ntabwo yegerwa na MONUSCO ngo iyibwire ibyiyo raporo, iyo raporo ntituyizi, tuyumva mu binyamakuru. Niba kandi inahari ni ibinyoma.
"Kuva mu 2009 u Rwanda ruri gufatanya na Congo gushakira amahoro kariya karere, twebwe nk'u Rwanda duhangayikishijwe n'uko hariya nta mahoro ahari, ariko dutangazwa no kumva Umuryango w'Abibumbye udushinja uruhare mu mutekano mucye uhari. Tubifata nko gushaka guhisha intege nke zabo mu kazi kabazanye hariya". Louise Mushikiwabo
Ubwanditsi
UMUSEKE.COM
0 comments:
Post a Comment