Inzaratsi mu muryango Nyarwanda

Inzaratsi ni ibintu cyangwa uburyo umuntu ashobora gukoresha ngo ategeke uwo ashaka kwigarurira mu bitekerezo kubera inyungu aba amutezeho.

Inzaratsi zibamo izo ngo bambara, basegura abantu, babagaburira….

Mu muryango nyarwanda ndetse no mu bindi bihugu aho sosiyete yemera ko umugabo aba umutware w’urugo, hari aho bigaragara ko umugabo runaka adashobora kuyobora urugo rwe ahubwo agendera ku mategeko rimwe na rimwe akarishye ahabwa n’umugore we, aha bakavuga ngo umugore we yamuhaye inzaratsi.
Habaho n’abandi bagabo bumvikana n’abafasha babo ku buryo usanga bafatanya muri twose bityo ugasanga bamwe mu batazi ihame ry’uburinganire burangwa no gufatanya, gukundana, kubahana ndetse no guhana agaciro kw’abashakanye bita bene abo bagabo imbwa akenshi bakanavuga ko mwene abo bahawe inzaratsi cyangwa bati yagaburiwe umutsima wo mu ngutiya.
Nubwo bimenyerewe ko umugabo ari umutware w’umuryango, mu miryango imwe n’imwe siko bimeze.
Hari aho usanga umugore yarazonze umugabo byitwa ko ngo amushyira ku murongo.
Iyo uwo mugabo atagifite bwa bwigenge bwe bwo gufata icyemezo ndetse n’ubwisanzure mu mubano we n’uwo bashakanye, icyo gihe uwo mugabo bavuga ko ari inganzwa.
Akenshi usanga abagabo nk’aba b’inganzwa barakanzwe ndetse akenshi ugasanga hari byinshi mu iterambere ry’umuryango adashobora gushyira mu bikorwa kubera ubwoba bw’uwo yashyingiranywe nawe.
Aba bagabo kandi usanga batinya kugera aho abandi bari kubera ikimwaro ndetse ugasanga no mu buzima bwabo bwa munsi kwifatira icyemezo bitaborohera na gato.
Kuba inganzwa iyo bikomeje nta kabuza bisenya umuryango. Ni na bumwe mu buryo abagore bakorera ihohotera abagabo babo nubwo bihagararaho bagatinya kubivuga ahubwo bagahitamo gushakira amahoro mu nzoga cyangwa bamwe bagahitamo kwiyandarika.
Mu mpamvu zitera abagabo kugirwa inganzwa harimo kuba umugabo yitinya bikabije, atajya afata icyemezo.
Ibi biha urwaho umugore iyo we atameze atyo, imyanzuro yose ikaba iye kandi igakurikizwa uko abishatse, kubera kwa kwitinya k’umugabo, umugore agahinduka intavugirwamo.
Indi mpamvu ni ukwipfobya kwa bamwe mu bagabo (inferiority complex) barushwa umutungo, amashuri cyangwa icyubahiro muri sosiyete n’abagore babo.
Aha iyo umugabo yiyumvamo kuba munsi y’umugore we kuko amurusha ibyo, agira kwa kwitinya maze umugore yaba abashije agatwara urugo umugabo akaba inkomamashyi.
Hari abagabo batinya inshingano. Bamwe babita “abagabo mbwa”. Bavuga bati umwana ararwaye akabaza umugore, bavuga ko nta cyo kurya yatanze agahunga ngo babaze umugore, haba hari ikibazo cy’ingutu cyugarije umuryango, umugore akaba ariwe kireba cyane.
Inshingano nyinshi iyo zibajijwe umugore, umugabo ageraho agata ijambo n’ubuyobozi bw’urugo. Akaba aria ho ameze nk’umwana mu rugo ugasanga bavuga ngo bamuhaye inzaratsi.
Inzaratsi rero zo zivugwaho byinshi, hari abazemera n’abatazemera. Abazemera bavuga ko zihindura imitekerereze y’umugabo, aho zimuhinduriza akumvira amategeko y’umugore we.
Ngo abagabo baba barazihawe mu mafunguro, ubundi ngo bazibasegura, cyangwa bazibarenza. Akenshi ngo biba ari ibyatsi bavugutiwe n’ibindi bintu bya gakondo.
Abatazemera bemera ko imiterere y’umugabo ariyo ishibora no gutuma bavuga ngo yahawe inzaratsi. Ariko ngo umugabo udafata umwanzuro, wisuzugura, witinya n’ibindi twavuze niwe bavuga ko yahawe izo nzaratsi.
Icya mbere mu bashakanye, iyo habayeho urukundo, kubahana, koroherana no kumvana hagati ya bombi nta nzaratsi cyangwa ubuganzwa bivugwa mu rwanyu.
Ibi byose ariko ngo bigomba gushingira ku miterere ya buri umwe mu bashakanye.
Iyo umwe mu bashakanye afite ikibazo cy’imiterere ye itari myiza, umujinya, inzigo, kwikunda bikabije, ubusambo, kwanga abantu n’ibindi bakunze kwita umutima mubi muri rusange, urugo ngo rurangwamo intonganya n’izo nzaratsi zikaba zahavugwa.

UMUSEKE.COM

Related Posts by Categories