Ubushinjacyaha bukuru buratangaza ko urubanza rwa Jean Uwinkindi ukurikiranyweho uruhare muri Genocide ruzakomeza nubwo uregwa yanze gusubiza ibibazo by'ubugenzacyaha.
Jean Uwinkindi ngo afite uburenganzira bwo kwicecekera
Alain Mukurarinda, Umuvugizi w'Ubushinjacyaha bw'u Rwanda yavuze ko ku nshuro ya kane Uwinkindi yanze gusubiza ibibazo yabajijwe mu Rukiko Rukuru, aho hariho humvwa uregwa ku byo aregwa by'uruhare yagize muri Genocide yakorewe abatutsi muri Kayenzi mu Bugesera aho yari umupasitori mu bapentekoti.
Mukurarinda yasobanuye ko Uwinkindi yanga gusubiza ibyo abazwa avuga ko uregwa afite uburenganzira bwo guceceka no kutagira icyo atangaza mu rukiko.
Mukurarinda ati: " Ubwo yahamagazwaga yavuze ko afite uburenganzira bwo kutagira icyo atangaza, ariko ibyo ntibizabuza urubanza gukomeza nubwo atavuga, cyane ko dossier ye yose ihari"
Mukurarinda yasobanuye kandi ko hari ibiteganywa n'amategeko mu gihe uregwa yahisemo 'kuruca akarumira' kandi agomba kuburanishwa ku byaha aregwa.
Tariki 27 z'uku kwezi kwa munani 2012 nibwo Jean Uwinkindi azongera kugezwa imbere y'Ubutabera, aho akurikiranyweho gushishikariza no gutegeka kwica abatutsi bari bahungiye mu rusengero yari abereye umuyobozi mu 1994.
Ku myaka 61, Jean Uwinkindi, yafatiwe i Mbarara muri Uganda tariki 30/06/ 2010,avuye muri Congo Kinshasa yiyoberanyije ku mazina ya Jean Inshitu, ari kugerageza kugura ubutaka ngo ature aho Mbarara. Yahise ashyikirizwa urukiko rwa Arusha tariki 02/07/ 2010.
Tariki 19/04/2012 urukiko rwa Arusha rwamwohereje mu Rwanda ari nawe wa mbere uru rukiko mpuzamahanga rwashyiriweho u Rwanda rwari rwohereje.
Ubwanditsi
UMUSEKE.COM
0 comments:
Post a Comment