Kuri uyu wa gatatu icyaranze cyane iyi sabukuru y'umukamwe Mandela ni aho abana barenga miliyoni 12 biga mu mashuri abanza muri Africa y'epfo mu gitondo bose bamuririmbiye indirimbo imwe yahimbiwe.
Abana mu gihugu hose baririmbiye Mandela indirimbo imwe bamuhimbiye
Mandela n’abatumirwa bacye ndetse bamwe mu ba hafi bagize umuryango we, kuri uyu mugoroba wo kuwa gatatu baraba bari iwe ku ivuko ahitwa Qunu hafi y'aho yavukiye mu muhango udakomeye wo kwizihiza imyaka 94 Mandela amaze ku Isi.
Kuwa kabiri nimugoroba, uwahoze ari President wa Amerika Bill Clinton, kuri uyu wa gatatu uri i Butaro mu Rwanda , akaba yaranyuze kureba Mandela iwe mu rwego rwo kumwifuriza umunsi mwiza w'amavuko.
Clinton yari kumwe n'umukobwa we Chelsea, babanje gufungura inzu y'ibitabo mu ishuri rya No-Moscow Primary School aho i Qunu, mbere yo guhura na Nelson Mandela.
Kuri iyi sabukuru ya Mandela, isi yose ifata nk'intwari ya Africa n'urugero rwoza rw'ubworoherane, Presida wa Amerika Barack Obama n'umugore we Michelle boherereje Mandela ubutumwa bumwifuriza kuramba kurenze aha.
Ubutumwa bw'umuryango wa Obama bwagarukaga "ku buzima bw'intangarugero mu guharanira amahame ya demokarasi n'ubwiyunge".
Muri Africa y'Epfo hose, umunsi w'amavuko wa Nelson Mandela wizihizwa imiryango ikennye ihabwa ubufasha butandukanye n'imiryango yifashije.
Mu kwizihiza y'imyaka 94 ya Mandela, irimo 27 yamaze muri Gereza abantu bashoboye nabo bashishikarizwa nibura kumara iminota 67 gusa kuri uyu munsu bakora igikorwa gifitiye umukene akamaro.
Kugeza ubu, urutonde ruto cyane rw'abatumiwe kuza gusangira na Mandela kuri uyu mugoroba iwe mu cyaro cya Qunu rwagizwe ibanga rikomeye.
Bill Clinton yasuye umukambwe Nelson Mandela amasaha 24 mbere y’uko yuzuza imyaka 94
Jean Paul Gashumba
UMUSEKE.COM
0 comments:
Post a Comment