Robin Van Persie yagiriwe inama na nyina yo kuguma mu ikipe ya Arsenal, mu gihe ari kwifuzwa muri Manchester City ngo imukubire hafi kabiri umushahara wafata i Londres.
Nyina Jose yamusabye kuguma aho akunzwe/photo thesun
Nyina witwa Jose yagize ati: " Arsenal iramukunda, iki nicyo kibanze agomba gushingiraho ahaguma. Kandi Arsenal ni ikipe nziza"
Ikipe ya Barcelona na Juventus de Turin nazo ziri mu zifuza gusinyisha Van Persie, umaze kuba umukinnyi mwiza w'umwaka wa Arsenal inshuro ebyiri yikurikiranya.
Mu cyumweru gishize, ibiganiro hagati ya Arsene Wenger, umuyobozi wa Arsenal Ivan Gazidis na Robin Van Persie ubwe, byabereye mu rugo rwa Wenger, bigamije kugerageza gusinyisha uyu mukinnyi amasezerano mashya, ntacyo byagezeho.
Arsenal irashaka kumuha umushahara ungana na £130 000 mu cyumweru na miliyoni 5 z'amapound z'agahimbazamusyi ka kontaro nshya, ibi byashimangira umwanya we wo kuba ariwe mukinnyi ubu ufata agatubutse muri Arsenal.
Ikipe ya Manchester City ariko yo iramukubira hafi kabiri kuko ishaka kumuha £250 000 mu minsi irindwi, ikanamugura igiciro cy'umurengera.
Umugore wa Van Persi witwa Bouchra we ati: " Arsenal yeretse Persie icyizere mu gihe yari mu bihe bibi, ntabwo rero twabishyura gutekereza andi makipe. Iwacu mu rugo turishimye ndetse n'abana bishimiye i Londres".
Iyi isa n'inkuru nziza ku bafana ba Arsenal, n’ubwo nyiri ubwite ataragira icyo atangaza dore ko ari kumwe n'ikipe y'igihugu y'Ubuholandi bitegura imikino ya Euro izatangira tariki 8/06.
Ese Robin van Persie azumva impanuro za nyina?
Egide RWEMA
UMUSEKE.COM
0 comments:
Post a Comment