Libiya: Abanyamakuru ba BBC barashinyaguriwe

BBC iratangaza ko abanyamakuru bayo batatu bakora muri serivisi y'icyarabu bafashwe bagafungwa bakanakubitwa n'abasirikare ba Leta ya Libiya igihe abo banyamakuru bageragezaga kwinjira mu mugi wa Zawiya uherutse kongera kwigarurirwa n'ingabo za Leta. Abo banyamakuru ngo barashinyaguriwe bahabwa igihano cy'urupfu baraswa amasasu atarabagezeho by'iterabwoba. Barekuwe nyuma y'amasaha 21 mu buroko bwari bwuzuyemo amaraso. Nyuma y'uko barekurwa guvernoma yasabye imbabazi BBC.

Intambara irakomeje muri Libiya aho ingabo za Kadafi ziri imbere mu ntambara. Zimaze kwigarurira uturere turi hafi ya Tripoli twari twafashwe n'abarwanya ubutegetsi.

Abarwanya ubutegetsi basabye ko ONU ishyiraho itegeko ryo kubuza indege za Leta kuguruka (no-fly zone) ariko ntibyoroshye kuko nubwo ibihugu nk'Ubwongereza, Ubufaransa na Leta Zunze Ubumwe z'Amerika zishyigikiye icyo gitekerezo, ibihugu nk'Uburusiya n'Ubushinwa ntibibyemera bivuga ko ari ukuvogera ubwigenge bwa Libiya.

Perezida Kadafi we yabwiye Televiziyo ya Turkiya ko gushyiraho itegeko ribuza indege ze z'intambara kuguruka yabyungukiramo kuko byaba bigaragara ko abakoloni bashaka kugaruka muri Libiya kwigarurira peteroli ya Libiya, yavuze ko abanyalibiya baba babonye impamvu yo gufata intwaro no kurwanya uwo ari we wese uje kurwanya Libiya.

Uyu munsi Luis Amado, minisitiri w'ububanyi n'amahanga wa Portugal we yahuye n'intumwa ya Libiya i Lisbone baganira ku kibazo cy'imidugararo iri muri Libiya. Portugal n'iyo iyoboye akanama ka ONU gashinzwe ibihano kuri Libiya.

Related Posts by Categories