U Rwanda ngo rwaba rwarumvikanye n'u Bufaransa kubya Kabuye

	Rose Kabuye ngo yagiye mu Bufarunsa ku bw'umwumvikano

Iyo nkuru yashyizwe ahagaragara ku itariki ya 04 z'ukwa mbere na ministre w'ububanyi n'amahanga w'u bufaransa Bernard Koushner, nyuma y'uko umunyanamakuru n'umwanditsi Pierre Péan asohoye igitabo kinenga imikorere y'uwo mu ministre.

Icyo gitabo Pierre Péan yise " Le monde selon K", uko Kousher abona isi, iyo "K" ikaba ari inyuguti itangira izina rya Koushner, kivuga ku myitwarire ya Koushner mu buzima busanzwe nk'umuganga, umutabazi ndetse n'umunyapolitiki

Ku birebana n'u Rwanda rero, igitabo cyemeza ko ngo Koushner yaba yarakoze ibishoboka byose ngo abangamire ikurikiranwa mu nkiko ry'abategetsi icyenda bo mu ngabo z'inkotanyi.

Abo bategetsi bakaba bari bararezwe n'umucamanza Jean Louis Bruguière kugira uruhare mu iraswa ry'indege y'uwahoze ayobora u Rwanda juvenal Habyarimana ku itariko ya 6 z'ukwa kane muri 1994. Iyo ndege ikaba yaraguyemo n'abafaransa batatu, ari bo babaye intandaro y'iki kirego cyatanzwe n'imiryango yabo mu Bufaransa.

Akibibona, Bernard Koushner yitabaje itangazamakuru ngo yiregure nk'uko na Pierre Péan yari yaryifashishije ngo amenyekanishe ibirego amurega mu gitabo cye.

Mu kiganiro cyihariye yagiranye n'ikinyamakuru Le nouvel Observateur cyo mu Bufaransa ku itariki ya 04 z'ukwa mbere, Koushner yabajijwe niba koko yaragerageje kubangamira ifatwa ry'abo bantu mu nyungu ze zo kugarura umubano hagati y'u Rwanda n'u Bufaransa.

Mu gusubiza, Kouchner aragira ati " abanyarwanda badusabye gukuraho inyandiko zifata bariya bantu mbere y'uko bafatwa. Twabasubije ko bidashoboka, ko ubutabera ari urwego rwigenga.

Nyuma, itsinda ry'abanyamategeko ryaje kugira inama u Rwanda ko kugira ngo rugere kuri dosiye yose y'ibirego nibura umwe muri icyenda baregwa agomba kwishyikiriza ubutabera bw'u Bufaransa. Ni byo uwahoze ayobora protocole ya Kagame, Roza Kabuye, yakoze."

N'ubwo iryo fatwa rya Roza kabuye ministre Koushner yemeza ko ryari mu bwumvikane bw'impande zombi,ryakurikiwe n'ihagarikwa ry'akazi mu Rwanda, abantu bakwirwa mu mihanda bigaragambya.

Ndetse n'uhagarariye u Budage mu Rwanda aza guhambirizwa ngo abe asubiye mu gihugu cye. Roza Kabuye yajyiye mu Bufaransa abanje gufatirwa mu Budage, bukaba kimwe n'ibindi bihugu by'i Burayi butegetswe kubahiriza inyandiko zifata abantu zitanzwe n'igihugu cyo mu muryango w'ibihugu by'i Burayi.

Muri icyo kiganiro na none, Koushner yavuze ko atigeze agambanira igihugu cye cy'u Bufaransa mu Rwanda ngo abushinje uruhare mu itsembabwoko nk'uko bikomozwaho muri icyo gitabo. Ati " ingabo z'u Bufaransa zari zifite inshingano yo gutoza iz'u Rwanda ariko igihe cyose navuze ko nta ruhare zagize mu itsembabwoko".

Ati " mu rwego rwa politiki navuze ko habayeho kwibeshya mu gusesengura ibibazo, ariko ndagira ngo bisobanuke neza, sinigeze ntekereza ko François Mitterand, Edouard Balladur, Alain Juppé, Hubert Vedrine cyangwa Dominique de Villepin bagize uruhare urwo ari rwo rwose muri ayo mahano".

Abo bategetsi bose b'abafaransa bakaba bari ku rutonde rw'abandi bafaransa 33 akanama kitiriwe Mucyo kaemeje ko bakwiye gukurikiranwa mu nkiko kubera uruhare bagize mu itsembabwoko ryabaye mu rwanda muri 1994.

Related Posts by Categories