Nyamirambo- Ku gicamunsi cyo kuri uyu wa 16 Kanama 2012 ni bwo Umunyamahirwe Uwumukiza Savio w'imyaka 20 yegukanye imodoka ya miliyoni 12 yatsindiye mu mukino wa Sharama na MTN. Iyi modoka ikaba yatangiwe ku ishami rya MTN ryo mu Biryogo.
Uwumukiza Savio yegukanye imodoka y’agaciro ka miliyoni 12 /Photo: E. Ntivuguruzwa
Mu byishimo byinshi, Uwumukiza akaba ashimira MTN yateguye aya marushanwa kandi agahamya ko umuntu atsinda ku bw'amahirwe ye kuko nta muntu bari baziranye ukora muri MTN.
Uwum ukiza Savio ni Umunyeshuri wiga mu mwaka wa 6 w'Amashuri yisumbuye muri Colllege de Nkanka mu Karere ka Rusizi mu Ntara y'Iburengerazuba.
Uwumukiza atomboye imodoka nyuma y'uko yari yatomboye mudasobwa igendanwa (Laptop) ndetse na Modem ifite internet y'ukwezi kose.
Ku kibazo amafaranga yaba yarakoresheje kugeza ubwo yegukanye iyi modoka, Uwumukiza yatangarije UMUSEKE.COM ko abarirwa mu bihumbi ijana by'amafaranga y'u Rwanda.
Mugabe Robert ushinzwe ibikorwa byo kwamamaza muri MTN atangaza ko abantu bakwiriye gukomeza kwitabira uyu mukino wa Sharama na MTN kuko amahirwe afunguriye buri wese kandi akavuga ko umuntu ahabwa amahirwe bishingiye ku butumwa bugufi yohereje.
Umukino wa Sharama na MTN ukorwa umuntu yohereza ubutumwa bugufi (SMS) bw' ijambo MTN kuri 155 maze agahabwa amahirwe yo gutsindira ibihembo bitandukanye. Uko umuntu yohereje ubutumwa, ahabwa ubundi bw'ubuntu kandi nk'uko bitangazwa n'abashinzwe ibikorwa byo kwamamaza muri MTN, uko umuntu yohereje ubutumwa bwinshi ni ko amahirwe yo gutsindira ibihembo bitandukanye yiyongera.
Imodoka ya miliyoni 12 yatanzwe kuri uyu wa kane ni yo ya mbere itanzwe muri uyu mukino ariko hakaba hakiri n'izindi zizegukanwa n'abanyamahirwe muri uyu mukino.
Uretse imodoka yatanzwe, abanyamahirwe babashije gutsindira ibindi bikoresho bitandukanye birimo moto, amagare, Laptop, matelas n'ibindi.
NTIVUGURUZWA Emmanuel
UMUSEKE.COM
0 comments:
Post a Comment