ADDIS ABABA — Nyuma y'amatora yakozwe inshuro zigera kuri enye habuze urusha undi amajwi, Madame Nkosazana Dlamini Zuma niwe waje kwegukana intsinzi ku manota 37 imbere ya Jean Ping.
Madame Zuma asanzwe ari inzobere muri Politiki/photo AFP
Uyu mugore wa mbere ugiye kuyobora akanama k'Umuryango wa Africa y'unze Ubumwe niwe wahise wemezwa n'Umuyobozi w'uyu muryango ubu, President Thomas Yayi Boni wa Benin.
Uyu mugore w'imyaka 63, ni inararibonye muri Politiki, akaba kandi n'umuganga wabyigiye, yigeze kuba Ministre w'Ubuzima muri Leta ya Nelson Mandela, yabaye Ministre w'Ububanyi n'Amahanga muri Leta ya Thabo Mbeki, ubu akaba ari Ministre w'Ubutegetsi bw'Igihugu kuri Leta ya Jacob Zuma wahoze ari umugabo we bakaza gutana.
Intsinzi ye ije nyuma y'amezi atandatu binaniranye ko hagati ye na Jean Ping haboneka utsinda ku majwi ya bibiri bya gatatu yari akenewe.
Madame Nkosazana niwe mugore wa mbere ugiye kuyobora aka kanama, yahise ashimirwa cyane na benshi mu bakuru b'ibihugu bari bateraniye mu nama y'uyu umuryango wa Africa y'unze ubumwe yasoje imirimo yayo kuri iki cyumweru.
Jean Paul Gashumba
UMUSEKE.COM
0 comments:
Post a Comment