Ikipe ya Young Africans kuri uyu munsi iracakirana na APR FC ku mukino wa nyuma mu itsinda C muri Cecafa Kagame cup. Uyu mukino uri bubere kuri National Stadium i Dar es Salaam utegerejwe n'abantu benshi kuko ari umukino w'amakipe akomeye muri iri tsinda.
Ikipe ya Young Africans iza kuba iri imbere y'abafana bayo irasabwa gutsinda uyu mukino kugirango ikomeze ari iya kabiri, naho APR irasabwa kunganya gusa kugirango nayo ibashe gukomeza muri 1/4 cy'irangiza nibura ari iya mbere kuri Atletico.
Young y'umukinnyi Haruna Niyonzima wahoze muri APR, ifite amanota atatu muri iri tsinda, mu gihe APR ifite amanota ane.
Kuri uyu mukino uza kuba guhera ku isaha ya saa cyenda zo mu Rwanda, abafana b'ikipe ya Simba yo muri Tanzania, mukeba ukomeye wa Young ngo batangaje ko baza gutiza umurindi ikipe ya APR mu rugamba iza kuba iriho.
Uyu mukino wa Young na APR urabanzirizwa n'umukino uza guhuza ikipe ya URA na Ports yo muri Djibouti zo mu itsinda A.
Mu itsinda C APR na Young zirimo, ikipe ya Atletico y'i Burundi yaraye ibonye ticket ya 1/4 itsinda Wau Salam ibitego bitanu ku busa. Iyi kipe yo muri South Soudan akaba ariyo ya mbere yasezerewe muri aya marushanwa ijyanye umwenda w'ibitego 18 mu mikino itatu yakinnye.
Ikipe ya Young cyangwa APR, iramuka itsinzwe uyu mukino, ishobora kugira amahirwe yo kuzamuka nk'ikipe ya gatatu yitwaye neza (best looser) ikaba yahura n'iyabaye iya mbere mu itsinda A muri 1/4 aho URA ariyo ihabwa aya mahirwe niramuka itsinze Ports mu mukino wa none.
Egide RWEMA
UMUSEKE.COM
0 comments:
Post a Comment